Shaam Same Ek Oonchi Seerhion Wale Ghar Ke
Ibn-e-Insha Ghazal
Shaam Same Ek Oonchi Seerhion Wale Ghar Ke Aangan Mein
Chaand Ko Utre Dekha Hum Ne Chaand Bhi Kaisa? Poora Chaand
Insha Ji In Chahne Wali Dekhne Wali Aankhon Ne
Mulkon Mulkon Shehron Shehron Kaisa Kaisa Dekha Chaand
Har Ek Chaand Ki Apni Dhaj Thi Har Ek Chaand Ka Apna Roop
Lekin Aisa Roshan Roshan Hnsta Baatein Karta Chaand
Dard Ki Thais Bhi Uthti Thi Par Itni Bhi Bharpoor Kabhi
Aaj Se Pehle Kab Utra Tha Dil Mein Mere Gehraa Chaand
Hum Ne To Qismat Ke Dar Se Jab Paaye Andhere Paaye
Yeh Bhi Chaand Ka Sapna Hoga Kaisa Chaand Kahaan Ka Chaand
Insha Ji Duniya Walon Mein Be Saathi Be Dost Rahe
Jaise Taron Ke Jhurmat Mein Tanha Chaand Akela Chaand
Un Ka Daman Is Daulat Se Khaali Ka Khaali Hi Raha
Warna The Duniya Mein Kitne Chaandi Chaand Aur Sona Chaand
Jag Ke Charon Kot Mein Ghooma Sailani Hairan Hua
Is Basti Ke Is Koche Ke Is Aangan Mein Aisa Chaand
Aankhon Mein Bhi Chatun Mein Bhi Chaand Hi Chaand Jhalakte Hain
Chaand Hi Teeka Chaand Hi Jhoomar Chehra Chaand Aur Maatha Chaand
Ek Yeh Chaand Nagar Ka Baasi Jis Se Door Raha Sanjog
Warna Is Duniya Mein Sab Ne Chaha Chaand Aur Paaya Chaand
Ambar Ne Dharti Par Phainki Noor Ki Chhint Udaas Udaas
Aaj Ki Shab To Andhi Shab Thi Aaj Kidhar Se Nikla Chaand
Insha Ji Yeh Aur Nagar Hai Is Basti Ki Reet Yahi Hai
Sab Ki Apni Apni Aankhen Sab Ka Apna Apna Chaand
Apna Seene Ke Matla Par Jo Bhi Chamka Chaand Hua
Jis Ne Man Ke Andhiyaare Mein Aan Kiya Ujyara Chaand
Chanchal Muskati Muskati Gori Ka Mukhda Mehtab
Patjhad Ke Pedon Mein Atka Peela Sa Ik Patta Chaand
Dukh Ka Darya Sukh Ka Sagar Is Ke Dam Se Dekh Liye
Hum Ko Apne Saath Hi Le Kar Dooba Chaand Aur Ubhra Chaand
Roshniyon Ki Peeli Kiranen Poorab Picham Phel Gayi
Tu Ne Kis Shay Ke Dhoke Mein Patthar Pe De Tapka Chaand
Hum Ne To Dono Ko Dekha Dono Hi Be-Dard Kathor
Dharti Wala Ambar Wala Pehla Chaand Aur Dooja Chaand
Chaand Kisi Ka Ho Nahi Sakta Chaand Kisi Ka Hota Hai?
Chaand Ki Khaatir Zid Nahi Karte Ae Mere Achhe Insha Chaand
شام سمے ایک اونچی سیڑھوں والے گھر کے آنگن میں
چاند کو اترے دیکھا ہم نے چاند بھی کیسا؟ پورا چاند
انشاءؔ جی ان چاہنے والی دیکھنے والی آنکھوں نے
ملکوں ملکوں شہروں شہروں کیسا کیسا دیکھا چاند
ہر اک چاند کی اپنی دھج تھی ہر اک چاند کا اپنا روپ
لیکن ایسا روشن روشن ہنستا باتیں کرتا چاند
درد کی ٹھیس بھی اٹھتی تھی پر اتنی بھی بھرپور کبھی
آج سے پہلے کب اترا تھا دل میں میرے گہرا چاند
ہم نے تو قسمت کے در سے جب پائے اندھیرے پائے
یہ بھی چاند کا سپنا ہوگا کیسا چاند کہاں کا چاند
انشاءؔ جی دنیا والوں میں بے ساتھی بے دوست رہے
جیسے تاروں کے جھرمٹ میں تنہا چاند اکیلا چاند
ان کا دامن اس دولت سے خالی کا خالی ہی رہا
ورنہ تھے دنیا میں کتنے چاندی چاند اور سونا چاند
جگ کے چاروں کوٹ میں گھوما سیلانی حیران ہوا
اس بستی کے اس کوچے کے اس آنگن میں ایسا چاند
آنکھوں میں بھی چتون میں بھی چاند ہی چاند جھلکتے ہیں
چاند ہی ٹیکا چاند ہی جھومر چہرہ چاند اور ماتھا چاند
ایک یہ چاند نگر کا باسی جس سے دور رہا سنجوگ
ورنہ اس دنیا میں سب نے چاہا چاند اور پایا چاند
امبر نے دھرتی پر پھینکی نور کی چھینٹ اداس اداس
آج کی شب تو آندھی شب تھی آج کدھر سے نکلا چاند
انشاءؔ جی یہ اور نگر ہے اس بستی کی ریت یہی ہے
سب کی اپنی اپنی آنکھیں سب کا اپنا اپنا چاند
اپنا سینے کے مطلع پر جو بھی چمکا چاند ہوا
جس نے مَن کے اندھیارے میں آن کیا اُجیارا چاند
چنچل مسکاتی مسکاتی گوری کا مکھڑا مہتاب
پت جھڑ کے پیڑوں میں اٹکا پیلا سا اِک پتہ چاند
دکھ کا دریا سکھ کا ساگر اس کے دم سے دیکھ لئے
ہم کو اپنے ساتھ ہی لے کر ڈوبا چاند اور اُبھرا چاند
روشنیوں کی پیلی کرنیں پورب پچھم پھیل گئیں
تو نے کس شے کےدھوکے میں پتھر پہ دے ٹپکا چاند
ہم نے تو دونوں کو دیکھا دونوں ہی بے درد کٹھور
دھرتی والا امبر والا پہلا چاند اور دوجا چاند
چاند کسی کا ہو نہیں سکتا چاند کسی کا ہوتا ہے؟
چاند کی خاطر ضد نہیں کرتے اے میرے اچھے انشاءؔ چاند
