Teri Aawaz by Sahir Ludhianvi
Raat Sansaan Thi, Bojhal Thin Faza Ki Saansen
Rooh Par Chhaaye The Be-Naam Ghamon Ke Saaye
Dil Ko Ye Zid Thi Ke Tu Aaye Tasalli Dene
Meri Koshish Thi Ke Kambakht Ko Neend Aajaye
Der Tak Aankhon Mein Chubhti Rahi Taaron Ki Chamak
Der Tak Zehan Sulagta Raha Tanhaayi Mein
Apne Thukraaye Huye Dost Ki Pursish Ke Liye
Tu Na Aayi Magar Us Raat Ki Pehnaayi Mein
Yoon Achanak Teri Aawaaz Kahin Se Aayi
Jaise Parbat Ka Jigar Cheer Ke Jharna Phootay
Ya Zameenon Ki Mohabbat Mein Tarap Kar Naagaah
Aasmaanon Se Koi Shokh Sitaara Tootay
Shehed Sa Ghul Gaya Tal-Khaba-E Tanhaayi Mein
Rang Sa Phail Gaya Dil Ke Siyah Khanay Mein
Der Tak Yoon Teri Mastana Sadaayein Goonjein
Jis Tarah Phool Chatakne Lagen Weeraane Mein
Tu Bohat Door Kisi Anjuman-E Naaz Mein Thi
Phir Bhi Mehsoos Kiya Maine Ke Tu Aayi Hai
Aur Naghmon Mein Chhupa Kar Mere Khoye Huye Khwab
Meri Roothee Hui Neendon Ko Mana Laayi Hai
Raat Ki Satah Par Ubhre Tere Chehre Ke Naqosh
Wohi Chup-Chaap Si Aankhein Wohi Saada Si Nazar
Wohi Dhalka Hua Aanchal Wohi Raftaar Ka Kham
Wohi Reh-Reh Ke Lachakta Hua Naazuk Paikar
Tu Mere Paas Na Thi Phir Bhi Sahar Hone Tak
Tera Har Saans Mere Jism Ko Choo Kar Guzra
Qatra Qatra Tere Deedaar Ki Shabnam Tapki
Lamha Lamha Teri Khushboo Se Muattar Guzra
Ab Yahi Hai Tujhe Manzoor To Ae Jaan-E Qarar
Main Teri Raah Na Dekhunga Siyah Raato Mein
Dhoondh Lenge Meri Tarsee Hui Nazrein Tujh Ko
Naghma, Sher Ki Umdi Hui Barsaaton Mein
Ab Tera Pyaar Satayega To Meri Hasti
Teri Masti Bhari Aawaaz Mein Dhal Jaayegi
Aur Ye Rooh Jo Tere Liye Be-Chain Si Hai
Geet Ban Kar Tere Honto Pe Machal Jaayegi
Tere Naghmaat Tere Husn Ki Thandak Le Kar
Mere Tapte Huye Maahaul Mein Aa Jaayenge
Chand Ghadiyon Ke Liye Hon Ke Hamesha Ke Liye
Meri Jaagi Hui Raato Ko Sula Jaayenge
نظم – تیری آواز
رات سنسان تھی بوجھل تھیں فضا کی سانسیں
روح پر چھائے تھے تھے بے نام غموں کے سائے
دل کو یہ ضد تھی کہ تو آئے تسلی دینے
میری کوشش تھی کہ کمبخت کو نیند آجائے
دیر تک آنکھوں میں چبھتی رہی تاروں کی چمک
دیر تک ذہن سلگتا رہا تنہائی میں
اپنے ٹھکرائے ہوئے دوست کی پرسش کیلیے
تو نہ آئی مگر اس رات کی پہنائی میں
یوں اچانک تری آواز کہیں سے آئی!
جیسے پربت کا جگر چیر کے جھرنا پھوٹے
یا زمینوں کی محبت میں تڑپ کر ناگاہ
آسمانوں سے کوئی شوخ ستارہ ٹوٹے
شہد سا گھل گیا تلخابہء تنہائی میں
رنگ سا پھیل گیا دل کے سیہ خانے
دیر تک یوں تری مستانہ صدائیں گونجیں
جس طرح پھول چٹکنے لگیں ویرانے میں
تو بہت دور کسی انجمنِ ناز میں تھی
پھر بھی محسوس کیا میں نے کہ تو آئی ہے
اور نغموں میں چھپا کر مرے کھوئے ہوئے خواب
میری روٹھی ہوئی نیندوں کو منا لائی ہے
رات کی سطح پر ابھرے ترے چہرے کے نقوش
وہی چپ چاپ سی آنکھیں وہی سادہ سی نظر
وہی ڈھلکا ہوا آنچل وہی رفتار کا خم
وہی رہ رہ کے لچکتا ہوا نازک پیکر
تو میرے پاس نہ تھی پھر بھی سحر ہونے تک
تیرا ہر سانس مرے جسم کو چھو کر گزرا
قطرہ قطرہ ترے دیدار کی شبنم ٹپکی
لمحہ لمحہ تری خوشبو سے معطر گزرا
اب یہی ہے تجھے منظور تو اے جانِ قرار
میں تری راہ نہ دیکھوں گا سیہ راتوں میں
ڈھونڈ لیں گی مری ترسی ہوئی نظریں تجھ کو
نغمہ شعر کی امڈی ہوئی برساتوں میں
اب تیرا پیار ستائے گا تو میری ہستی!
تری مستی بھری آواز میں ڈھل جائے گی
اور یہ روح جو تیرے لیے بے چین سی ہے
گیت بن کر ترے ہونٹوں پہ مچل جائے گی
ترے نغمات تیرے حسن کی ٹھنڈک لے کر
میرے تپتے ہوئے ماحول میں آ جائیں گے
چند گھڑیوں کے لیے ہوں کہ ہمیشہ کیلیے
مری جاگی ہوئی راتوں کو سلا جائیں گے
ساحر لدھیانوی
