Nisaar Main Teri Galiyon Ke Ae Watan Ke Jahan
By Faiz Ahmed Faiz
Nisaar Main Teri Galiyon Ke Ae Watan Ke Jahan
Chali Hai Rasm Ke Koi Na Sar Utha Ke Chale
Jo Koi Chahne Wala Tawaaf Ko Nikle
Nazar Chura Ke Chale, Jism-o-Jaan Bacha Ke Chale
Hai Ahl-e-Dil Ke Liye Ab Ye Nazm-e-Bast-o-Kushaad
Ke Sang-o-Khisht Muqayyad Hain Aur Sag Azaad
Bohat Hai Zulm Ke Dast-e-Bahaana Joo Ke Liye
Jo Chand Ahl-e-Junoon Tere Naam Liwa Hain
Bane Hain Ahl-e-Hawas Mudda’i Bhi, Munsif Bhi
Kise Wakeel Karein, Kis Se Munsifi Chahein
Magar Guzaarne Walon Ke Din Guzarte Hain
Tere Firaaq Mein Yun Subh-o-Shaam Karte Hain
Bujha Jo Rozan-e-Zindan To Dil Ye Samjha Hai
Ke Teri Maang Sitaaron Se Bhar Gayi Hogi
Chamak Uthe Hain Silsil, To Hum Ne Jaana Hai
Ke Ab Sahar Tere Rukh Par Bikhar Gayi Hogi
Gharaz Tasawwur-e-Shaam-o-Seher Mein Jeete Hain
Giraft Saaya-e-Deewar-o-Dar Mein Jeete Hain
Yun Hi Hamesha Uljhti Rahi Hai Zulm Se Khalq
Na Un Ki Rasm Nai Hai Na Apni Reet Nai
Yun Hi Hamesha Khilaye Hain Hum Ne Aag Mein Phool
Na Un Ki Haar Nai Hai Na Apni Jeet Nai
Isi Sabab Se Falak Ka Gila Nahin Karte
Tere Firaaq Mein Hum Dil Bara Nahin Karte
Gar Aaj Tujh Se Juda Hain To Kal Baham Honge
Ye Raat Bhar Ki Judaai To Koi Baat Nahin
Gar Aaj Ouj Pe Hai Taale’ Raqeeb To Kya
Ye Chaar Din Ki Khudai To Koi Baat Nahin
Jo Tujh Se Ahad-e-Wafa Ustawaar Rakhte Hain
Ilaaj-e-Gardish-e-Leil-o-Nahaar Rakhte Hain
نثار میں تری گلیوں کے اے وطن کہ جہاں
چلی ہے رسم کہ کوئی نہ سر اٹھا کے چلے
جو کوئی چاہنے والا طواف کو نکلے
نظر چرا کے چلے جسم و جاں بچا کے چلے
ہے اہل دل کے لیے اب یہ نظم بست و کشاد
کہ سنگ و خشت مقید ہیں اور سگ آزاد
بہت ہے ظلم کے دست بہانہ جو کے لیے
جو چند اہل جنوں تیرے نام لیوا ہیں
بنے ہیں اہل ہوس مدعی بھی منصف بھی
کسے وکیل کریں کس سے منصفی چاہیں
مگر گزارنے والوں کے دن گزرتے ہیں
ترے فراق میں یوں صبح و شام کرتے ہیں
بجھا جو روزن زنداں تو دل یہ سمجھا ہے
کہ تیری مانگ ستاروں سے بھر گئی ہوگی
چمک اٹھے ہیں سلاسل تو ہم نے جانا ہے
کہ اب سحر ترے رخ پر بکھر گئی ہوگی
غرض تصور شام و سحر میں جیتے ہیں
گرفت سایۂ دیوار و در میں جیتے ہیں
یوں ہی ہمیشہ الجھتی رہی ہے ظلم سے خلق
نہ ان کی رسم نئی ہے نہ اپنی ریت نئی
یوں ہی ہمیشہ کھلائے ہیں ہم نے آگ میں پھول
نہ ان کی ہار نئی ہے نہ اپنی جیت نئی
اسی سبب سے فلک کا گلہ نہیں کرتے
ترے فراق میں ہم دل برا نہیں کرتے
گر آج تجھ سے جدا ہیں تو کل بہم ہوں گے
یہ رات بھر کی جدائی تو کوئی بات نہیں
گر آج اوج پہ ہے طالع رقیب تو کیا
یہ چار دن کی خدائی تو کوئی بات نہیں
جو تجھ سے عہد وفا استوار رکھتے ہیں
علاج گردش لیل و نہار رکھتے ہیں
