Tumhare Khat Mein Naya Ik Salaam Kis Ka Tha
Dagh Dehlvi
Tumhare Khat Mein Naya Ik Salaam Kis Ka Tha
Na Tha Raqeeb To Aakhir Woh Naam Kis Ka Tha
Woh Qatl Kar Ke Mujhe Har Kisi Se Poochte Hain
Yeh Kaam Kis Ne Kiya Hai Yeh Kaam Kis Ka Tha
Wafa Karenge, Nibahenge, Baat Maanenge
Tumhe Bhi Yaad Hai Kuch Yeh Kalaam Kis Ka Tha
Raha Na Dil Mein Woh Be-Dard Aur Dard Raha
Maqeem Kaun Hua Hai Maqaam Kis Ka Tha
Na Pooch Guch Thi Kisi Ki Wahan Na Aao Bhagat
Tumhari Bazm Mein Kal Ihtemaam Kis Ka Tha
Tamam Bazm Jise Sun Ke Reh Gayi Mushtaaq
Kaho Woh Tazkira-e-Naatamaam Kis Ka Tha
Hamaare Khat Ke To Purze Kiye, Parha Bhi Nahin
Suna Jo Tune Ba-Dil Woh Payaam Kis Ka Tha
Uthai Kyun Na Qayamat Adu Ke Koochay Mein
Lihaaz Aap Ko Waqt-e-Khiraam Kis Ka Tha
Guzar Gaya Woh Zamaana, Kahoon To Kis Se Kahoon
Khayal Dil Ko Mere Subh-o-Shaam Kis Ka Tha
Humein To Hazrat-e-Wa’ez Ki Zid Ne Pilwai
Yahan Iraada-e-Sharb-e-Madaam Kis Ka Tha
Agarche Dekhne Waale Tere Hazaaron The
Tabah Haal Bahut Zair-e-Baam Kis Ka Tha
Woh Kaun Tha Ke Tumhein Jis Ne Bewafa Jaana
Khayal-e-Khaam Yeh Souda-e-Khaam Kis Ka Tha
Inhi Sifaat Se Hota Hai Aadmi Mashhoor
Jo Lutf-e-Aam Woh Karte, Yeh Naam Kis Ka Tha
Har Ek Se Kehte Hain Kya Dagh Bewafa Nikla
Yeh Poochhe In Se Koi Woh Ghulaam Kis Ka Tha
تمہارے خط میں نیا اک سلام کس کا تھا
نہ تھا رقیب تو آخر وہ نام کس کا تھا
وہ قتل کر کے مجھے ہر کسی سے پوچھتے ہیں
یہ کام کس نے کیا ہے یہ کام کس کا تھا
وفا کریں گے نباہیں گے بات مانیں گے
تمہیں بھی یاد ہے کچھ یہ کلام کس کا تھا
رہا نہ دل میں وہ بے درد اور درد رہا
مقیم کون ہوا ہے مقام کس کا تھا
نہ پوچھ گچھ تھی کسی کی وہاں نہ آؤ بھگت
تمہاری بزم میں کل اہتمام کس کا تھا
تمام بزم جسے سن کے رہ گئی مشتاق
کہو وہ تذکرۂ ناتمام کس کا تھا
ہمارے خط کے تو پرزے کئے پڑھا بھی نہیں
سنا جو تو نے بہ دل وہ پیام کس کا تھا
اٹھائی کیوں نہ قیامت عدو کے کوچے میں
لحاظ آپ کو وقت خرام کس کا تھا
گزر گیا وہ زمانہ کہوں تو کس سے کہوں
خیال دل کو مرے صبح و شام کس کا تھا
ہمیں تو حضرت واعظ کی ضد نے پلوائی
یہاں ارادۂ شرب مدام کس کا تھا
اگرچہ دیکھنے والے ترے ہزاروں تھے
تباہ حال بہت زیر بام کس کا تھا
وہ کون تھا کہ تمہیں جس نے بے وفا جانا
خیال خام یہ سودائے خام کس کا تھا
انہیں صفات سے ہوتا ہے آدمی مشہور
جو لطف عام وہ کرتے یہ نام کس کا تھا
ہر اک سے کہتے ہیں کیا داغؔ بے وفا نکلا
یہ پوچھے ان سے کوئی وہ غلام کس کا تھا
