Tere Jamaal-e-Haqeeqat Ki Taab Hi Na Hui
Poet: Jigar Muradabadi
Tere Jamaal-e-Haqeeqat Ki Taab Hi Na Hui
Hazaar Baar Nigah Ki Magar Kabhi Na Hui
Teri Khushi Se Agar Gham Mein Bhi Khushi Na Hui
Woh Zindagi To Mohabbat Ki Zindagi Na Hui
Kahaan Woh Shokh Mulaqaat Khud Se Bhi Na Hui
Bas Aik Baar Hui Aur Phir Kabhi Na Hui
Woh Hum Hain Ahl-e-Mohabbat Ke Jaan Se Dil Se
Bohat Bukhaar Uthay Aankh Shabnami Na Hui
Thahar Thahar Dil-e-Betaab Pyaar To Kar Loon
Ab Is Ke Baad Mulaqaat Phir Hui Na Hui
Mere Khayaal Se Bhi Aah Mujh Ko Baad Raha
Hazaar Tarah Se Chaaha Barabari Na Hui
Hum Apni Rindi-o-Taa’at Pe Khaak Naaz Karein
Qubool Hazrat-e-Sultaan Hui Hui Na Hui
Koi Badhe Na Badhe Hum To Jaan Detey Hain
Phir Aisi Chashm-e-Tawajju Hui Hui Na Hui
Tamaam Harf-o-Hikaayat Tamaam Deeda-o-Dil
Is Ahtemaam Pe Bhi Sharh-e-Aashiqi Na Hui
Fasurda Khaatir-e-Ishq Ae Ma’aaz Allah
Khayaal-e-Yaar Se Bhi Kuch Shaguftagi Na Hui
Teri Nigaah-e-Karam Ko Bhi Aazma Dekha
Aziyatoun Mein Na Honi Thi Kuch Kami Na Hui
Kisi Ki Mast Nigaahi Ne Haath Thaam Liya
Shareek-e-Haal Jahan Meri Bekhudi Na Hui
Saba Yeh Un Se Hamaara Payaam Keh Dena
Gaye Ho Jab Se Yahan Subh-o-Shaam Hi Na Hui
Woh Kuch Sahi Na Sahi Phir Bhi Zahid-e-Naadan
Baday Badon Se Mohabbat Mein Kaafiri Na Hui
Idhar Se Bhi Hai Sawa Kuch Idhar Ki Majboori
Ke Hum Ne Aah To Ki Un Se Aah Bhi Na Hui
Khayaal-e-Yaar Salaamat Tujhe Khuda Rakhe
Tere Baghair Kabhi Ghar Mein Roshni Na Hui
Gaye Thay Hum Bhi Jigar Jalwah Gaah-e-Janaan Mein
Woh Poochhte Hi Rahe Hum Se Baat Bhi Na Hui
ترے جمال حقیقت کی تاب ہی نہ ہوئی
ہزار بار نگہ کی مگر کبھی نہ ہوئی
تری خوشی سے اگر غم میں بھی خوشی نہ ہوئی
وہ زندگی تو محبت کی زندگی نہ ہوئی
کہاں وہ شوخ ملاقات خود سے بھی نہ ہوئی
بس ایک بار ہوئی اور پھر کبھی نہ ہوئی
وہ ہم ہیں اہل محبت کہ جان سے دل سے
بہت بخار اٹھے آنکھ شبنمی نہ ہوئی
ٹھہر ٹھہر دل بے تاب پیار تو کر لوں
اب اس کے بعد ملاقات پھر ہوئی نہ ہوئی
مرے خیال سے بھی آہ مجھ کو بعد رہا
ہزار طرح سے چاہا برابری نہ ہوئی
ہم اپنی رندی و طاعت پہ خاک ناز کریں
قبول حضرت سلطاں ہوئی ہوئی نہ ہوئی
کوئی بڑھے نہ بڑھے ہم تو جان دیتے ہیں
پھر ایسی چشم توجہ ہوئی ہوئی نہ ہوئی
تمام حرف و حکایت تمام دیدہ و دل
اس اہتمام پہ بھی شرح عاشقی نہ ہوئی
فسردہ خاطرئ عشق اے معاذ اللہ
خیال یار سے بھی کچھ شگفتگی نہ ہوئی
تری نگاہ کرم کو بھی آزما دیکھا
اذیتوں میں نہ ہونی تھی کچھ کمی نہ ہوئی
کسی کی مست نگاہی نے ہاتھ تھام لیا
شریک حال جہاں میری بے خودی نہ ہوئی
صبا یہ ان سے ہمارا پیام کہہ دینا
گئے ہو جب سے یہاں صبح و شام ہی نہ ہوئی
وہ کچھ سہی نہ سہی پھر بھی زاہد ناداں
بڑے بڑوں سے محبت میں کافری نہ ہوئی
ادھر سے بھی ہے سوا کچھ ادھر کی مجبوری
کہ ہم نے آہ تو کی ان سے آہ بھی نہ ہوئی
خیال یار سلامت تجھے خدا رکھے
ترے بغیر کبھی گھر میں روشنی نہ ہوئی
گئے تھے ہم بھی جگرؔ جلوہ گاہ جاناں میں
وہ پوچھتے ہی رہے ہم سے بات بھی نہ ہوئی
