Apne Bete Ke Liye Ek Nazm – Parveen Shakir
اس بچے نے پہلی بار اُٹھایا ہے قلم
اور پوچھتا ہے
کیا لکھوں مما
میں تجھ سے کیا کہوں بیٹے
کہ اب سے برسوں پہلے
یہ لمحہ جب مری ہستی میں آیا تھا
تو میرے باپ نے مجھ کو سکھائے تھے
محبت ، نیکی، اور سچائی کے کلمے
مرے توشے میں ان لفظوں کی روٹی رکھ کے وہ سمجھا تھا
میرا راستہ کٹ جائے گا
آگے سفر آسان ہو جائے گا شاید!
محبت مجھ سے دنیا نے وصولی
قرض کی مانند
نیکی سود کی صورت میں
حاصل کی
مری سچائی کے سکے
ہوئے رد اس طرح سے
کہ میں فوراً سنبھلنے کی نہ گر تدبیر کرتی
تو سر پر چھت نہ رہتی
تن پہ پیراہن نہ بچتا
میں اپنے گھر میں رہ کر
عمر بھر جزیہ ادا کرتی رہی ہوں!
زمانہ
میرے خدشوں سے سوا عیار تھا
اور زندگی
میری توقع سے زیادہ بے مروت تھی
تعلق کے گھنے جنگل میں
بچھو سرسراتے تھے
مگر ہم اس کو سرشاری میں
فصلِ گل کی سرگوشی سمجھتے تھے
پتہ ہی کچھ نہ چلتا تھا
کہ خوابوں کی چھپر کھٹ پر
لباسِ ریشمیں
کس وقت بن کر کینچلی اترا
مخاطب کے روپہلے دانت
کب لمبے ہوئے
اور کان
کب پیچھے مڑے
اور پاؤں
کب غائب ہوئے یکدم!
میں اس کذب و ریا
اس بے لحاظی سے بھری دنیا میں رہ کر
محبت اور نیکی اور سچائی کا ورثہ
تجھ کو کیسے منتقل کردوں
مجھے کیا دے دیا اس نے!
مگر میں ماں ہوں
اور اک ماں اگر مایوس ہو جائے
تو دنیا ختم ہوجائے
سو میرے خوش گماں بچے!
تو اپنی لوحِ آئندہ پہ
سارے خوبصورت لفظ لکھنا
سدا سچ بولنا
احسان کرنا
پیار بھی کرنا
مگر آنکھیں کھلی رکھنا!
Apne Bete Ke Liye Ek Nazm
Is Bache Ne Pehli Baar Uthaaya Hai Qalam
Aur Poochta Hai
Kya Likhoon Mama
Main Tujh Se Kya Kahoon Bete
Ke Ab Se Barson Pehle
Yeh Lamha Jab Meri Hasti Mein Aaya Tha
To Mere Baap Ne Mujh Ko Sikhaaye The
Mohabbat, Neki, Aur Sachai Ke Kalme
Mere Toshe Mein In Alfaaz Ki Roti Rakh Ke Woh Samjha Tha
Mera Rasta Kat Jaayega
Aage Safar Aasaan Ho Jaayega Shayad!
Mohabbat Mujh Se Duniya Ne Wasooli
Qarz Ki Manind
Neki Sood Ki Soorat Mein
Haasil Ki
Meri Sachai Ke Sikke
Hue Rad Is Tarah Se
Ke Main Foran Sambhalne Ki Na Gir Tadbeer Karti
To Sar Par Chhat Na Rehti
Tan Pe Pehraan Na Bachta
Main Apne Ghar Mein Reh Kar
Umar Bhar Jaziya Ada Karti Rahi Hoon!
Zamana
Mere Khudshon Se Sawa Ayyar Tha
Aur Zindagi
Meri Tawaqqu Se Zyada Be Maroat Thi
Taluq Ke Ghane Jungle Mein
Bichhoo Sarsarate The
Magar Hum Is Ko Sarshaari Mein
Fasal-e-Gul Ki Sargoshi Samajhte The
Pata Hi Kuch Na Chalta Tha
Ke Khwabon Ki Chhapr Khat Par
Libaas-e-Resham
Kas Waqt Ban Kar Kenchli Utra
Mukhatib Ke Roophle Daant
Kab Lambe Hue
Aur Kaan
Kab Peeche Mrde
Aur Paon
Kab Ghaib Hue Yakdam!
Main Is Kazb-o-Riya
Is Be Lihazi Se Bhari Duniya Mein Reh Kar
Mohabbat Aur Neki Aur Sachai Ka Virsa
Tujh Ko Kaise Muntakil Kardo
Mujhe Kya De Diya Us Ne!
Magar Main Maa Hoon
Aur Ek Maa Agar Mayoos Ho Jaaye
To Duniya Khatam Ho Jaaye
So Mere Khush Gumaan Bache!
To Apni Loh-e-Aainda Pe
Saare Khoobsurat Alfaaz Likho
Sada Sach Bolna
Ehsaan Karna
Pyaar Bhi Karna
Magar Aankhein Khuli Rakhna!
Bastiyan Dhoondh Rahi Hain Unhein Veeranon Mein – Firaq
Umar Ka Bharosa Kya, Pal Ka Saath Ho Jaaye – Parveen Shakir
Kisi Ke Dil Mein Bas Ke Dil Ko Tadpana Nahi Acha – Lyrics
