Vairaana-e-Wujood Mein Chalna Pada Humein
Amjad Islam Amjad
ویرانۂ وجود میں چلنا پڑا ہمیں
اپنے لہو کی آگ میں جلنا پڑا ہمیں
منزل بہت ہی دُور تھی، رستے تھے اجنبی
تاروں کے ساتھ ساتھ نکلنا پڑا ہمیں
سایا مثال آئے تھے اُس کی گلی میں ہم
ڈھلنے لگی جو رات تو ڈھلنا پڑا ہمیں
اپنے کہے سے وہ جو ہُوا منحرف ، تو پھر
اپنا لکھا ہُوا بھی بدلنا پڑا ہمیں
محرابِ جاں کی شمعیں بچانے کے واسطے
ہر رات کنجِ غم میں پگھلنا پڑا ہمیں
ہم چڑھتے سُورجوں کو سلامی نہ دے سکے
سَو دوپہر کی دُھوپ میں جلنا پڑا ہمیں
تھا ابتدا سے علم کہ ہے راستہ غلط
اور قافلے کے ساتھ بھی چلنا پڑا ہمیں
شانے پہ اِس ادا سے رکھا پھر کسی نے ہاتھ
دل مانتا نہ تھا پہ بہلنا پڑا ہمیں
امجد کسی طرف بھی سہارا نہ تھا کوئی
جب بھی گرے تو خود ہی سنبھلنا پڑا ہمیں
Vairaana-e-Wujood Mein Chalna Pada Humein
Apne Lahoo Ki Aag Mein Jalna Pada Humein
Manzil Bohat Hi Door Thi, Raste Thay Ajnabi
Taron Ke Saath Saath Nikalna Pada Humein
Saaya Misaal Aaye Thay Us Ki Gali Mein Hum
Dhalne Lagi Jo Raat To Dhalna Pada Humein
Apne Kahe Se Woh Jo Hua Munharif, To Phir
Apna Likha Hua Bhi Badalna Pada Humein
Mehrab-e-Jaan Ki Shamain Bachane Ke Waaste
Har Raat Kunj-e-Gham Mein Pighalna Pada Humein
Hum Charhte Soorajon Ko Salaami Na De Sake
Sau Dophar Ki Dhoop Mein Jalna Pada Humein
Tha Ibtida Se Ilm Ke Hai Raasta Ghalat
Aur Qaafle Ke Saath Bhi Chalna Pada Humein
Shaane Pe Is Ada Se Rakha Phir Kisi Ne Haath
Dil Maanta Na Tha Pe Bahalna Pada Humein
Amjad Kisi Taraf Bhi Sahara Na Tha Koi
Jab Bhi Gire To Khud Hi Sambhalna Pada Humein
— Amjad Islam Amjad
