Mere Wehm-o-Gumaan Se Bhi Zyada Toot Jaata Hai

Mere Wehm-o-Gumaan Se Bhi Zyada Toot Jaata Hai,
Yeh Dil Apni Hadoon Mein Reh Ke Itna Toot Jaata Hai.

Main Rooun To Dar-o-Deewar Mujh Par Hansne Lagte Hain,
Hansoon To Mere Andar Jaane Kya Kya Toot Jaata Hai.

Main Jis Lamhe Ki Khwahish Mein Safar Karta Hoon Sadiyon Ka,
Kahin Paon Taley Aa Kar Woh Lamha Toot Jaata Hai.

Mere Khwabon Ki Basti Se Janaaze Uthte Jaate Hain,
Meri Aankhen Jise Chhoo Lein Woh Sapna Toot Jaata Hai.

Na Jaane Kitni Muddat Se Hai Dil Mein Yeh Amal Jaari,
Zara Si Theis Lagti Hai Zara Sa Toot Jaata Hai.

Dil-e-Naadan Humaari To Numoo Hi Na Mukammal Thi,
To Hairat Kya Jo Bante Hi Iraada Toot Jaata Hai.

Muqaddar Mein Mere Saagar Shikast-o-Rekht Itni Hai,
Main Jis Ko Apna Keh Doon Woh Sitaara Toot Jaata Hai.

مرے وہم و گماں سے بھی زیادہ ٹوٹ جاتا ہے
یہ دل اپنی حدوں میں رہ کے اتنا ٹوٹ جاتا ہے

میں روؤں تو در و دیوار مجھ پر ہنسنے لگتے ہیں
ہنسوں تو میرے اندر جانے کیا کیا ٹوٹ جاتا ہے

میں جس لمحے کی خواہش میں سفر کرتا ہوں صدیوں کا
کہیں پاؤں تلے آ کر وہ لمحہ ٹوٹ جاتا ہے

مرے خوابوں کی بستی سے جنازے اٹھتے جاتے ہیں
مری آنکھیں جسے چھو لیں وہ سپنا ٹوٹ جاتا ہے

نہ جانے کتنی مدت سے ہے دل میں یہ عمل جاری
ذرا سی ٹھیس لگتی ہے ذرا سا ٹوٹ جاتا ہے

دل ناداں ہماری تو نمو ہی نا مکمل تھی
تو حیرت کیا جو بنتے ہی ارادہ ٹوٹ جاتا ہے

مقدر میں مرے ساگرؔ شکست و ریخت اتنی ہے
میں جس کو اپنا کہہ دوں وہ ستارا ٹوٹ جاتا ہے

مرے وہم و گماں سے بھی زیادہ ٹوٹ جاتا ہے - سلیم ساغر