Gaye Dinon Ka Suragh Le Kar

Gaye Dinon Ka Suragh Le Kar Kidhar Se Aaya Kidhar Gaya Wo
Ajib Manus Ajnabi Tha Mujhe To Hairan Kar Gaya Wo

Bas Ek Moti Si Chhab Dikha Kar Bas Ek MiThi Si Dhun Suna Kar
Sitara-E-Sham Ban Ke Aaya Ba-Rang-E-KHwab-E-Sahar Gaya Wo

KHushi Ki Rut Ho Ki Gham Ka Mausam Nazar Use DhunDti Hai Har Dam
Wo Bu-E-Gul Tha Ki Naghma-E-Jaan Mere To Dil Mein Utar Gaya Wo

Na Ab Wo Yaadon Ka ChaDhta Dariya Na Fursaton Ki Udas Barkha
Yunhi Zara Si Kasak Hai Dil Mein Jo ZaKHm Gahra Tha Bhar Gaya Wo

Kuchh Ab Sambhalne Lagi Hai Jaan Bhi Badal Chala Daur-E-Asman Bhi
Jo Raat Bhaari Thi Tal Gai Hai Jo Din KaDa Tha Guzar Gaya Wo

Bas Ek Manzil Hai Bul-Hawas Ki Hazar Raste Hain Ahl-E-Dil Ke
Yahi To Hai Farq Mujh Mein Us Mein Guzar Gaya Main Thahar Gaya Wo

Shikasta-Pa Rah Mein KhaDa Hun Gae Dinon Ko Bula Raha Hun
Jo Qafila Mera Ham-Safar Tha Misal-E-Gard-E-Safar Gaya Wo

Mera Tu KHun Ho Gaya Hai Pani Sitamgaron Ki Palak Na Bhigi
Jo Nala UTTha Tha Raat Dil Se Na Jaane Kyun Be-Asar Gaya Wo

Wo Mai-Kade Ko Jagane Wala Wo Raat Ki Nind UDane Wala
Ye Aaj Kya Us Ke Ji Mein Aai Ki Sham Hote Hi Ghar Gaya Wo

Wo Hijr Ki Raat Ka Sitara Wo Ham-Nafas Ham-SuKHan Hamara
Sada Rahe Us Ka Nam Pyara Suna Hai Kal Raat Mar Gaya Wo

Wo Jis Ke Shane Pe Hath Rakh Kar Safar Kiya Tu Ne Manzilon Ka
Teri Gali Se Na Jaane Kyun Aaj Sar Jhukae Guzar Gaya Wo

Wo Raat Ka Be-Nawa Musafir Wo Tera Shair Wo Tera ‘Nasir’
Teri Gali Tak To Hum Ne Dekha Tha Phir Na Jaane Kidhar Gaya Wo

گئے دنوں کا سراغ لے کر کدھر سے آیا کدھر گیا وہ
عجیب مانوس اجنبی تھا مجھے تو حیران کر گیا وہ

بس ایک موتی سی چھب دکھا کر بس ایک میٹھی سی دھن سنا کر
ستارۂ شام بن کے آیا برنگ خواب سحر گیا وہ

خوشی کی رت ہو کہ غم کا موسم نظر اسے ڈھونڈتی ہے ہر دم
وہ بوئے گل تھا کہ نغمۂ جاں مرے تو دل میں اتر گیا وہ

نہ اب وہ یادوں کا چڑھتا دریا نہ فرصتوں کی اداس برکھا
یوں ہی ذرا سی کسک ہے دل میں جو زخم گہرا تھا بھر گیا وہ

کچھ اب سنبھلنے لگی ہے جاں بھی بدل چلا دور آسماں بھی
جو رات بھاری تھی ٹل گئی ہے جو دن کڑا تھا گزر گیا وہ

بس ایک منزل ہے بوالہوس کی ہزار رستے ہیں اہل دل کے
یہی تو ہے فرق مجھ میں اس میں گزر گیا میں ٹھہر گیا وہ

شکستہ پا راہ میں کھڑا ہوں گئے دنوں کو بلا رہا ہوں
جو قافلہ میرا ہم سفر تھا مثال گرد سفر گیا وہ

مرا تو خوں ہو گیا ہے پانی ستم گروں کی پلک نہ بھیگی
جو نالہ اٹھا تھا رات دل سے نہ جانے کیوں بے اثر گیا وہ

وہ مے کدے کو جگانے والا وہ رات کی نیند اڑانے والا
یہ آج کیا اس کے جی میں آئی کہ شام ہوتے ہی گھر گیا وہ

وہ ہجر کی رات کا ستارہ وہ ہم نفس ہم سخن ہمارا
صدا رہے اس کا نام پیارا سنا ہے کل رات مر گیا وہ

وہ جس کے شانے پہ ہاتھ رکھ کر سفر کیا تو نے منزلوں کا
تری گلی سے نہ جانے کیوں آج سر جھکائے گزر گیا وہ

وہ رات کا بے نوا مسافر وہ تیرا شاعر وہ تیرا ناصرؔ
تری گلی تک تو ہم نے دیکھا تھا پھر نہ جانے کدھر گیا وہ

Gaye Dinon Ka Suragh Le Kar – Nasir Kazmi Poetry