Na Manzilen Thin Na Kuchh Dil Mein Tha - Poetry

Na Manzilen Thin Na Kuchh Dil Mein Tha Na Sar Mein Tha
Ajab Nazara-E-La-Samtiyat Nazar Mein Tha

Itab Tha Kisi Lamhe Ka Ek Zamane Par
Kisi Ko Chain Na Bahar Tha Aur Na Ghar Mein Tha

Chhupa Ke Le Gaya Duniya Se Apne Dil Ke Ghao
Ki Ek Shakhs Bahut Taq Is Hunar Mein Tha

Kisi Ke Lautne Ki Jab Sada Suni To Khula
Ki Mere Sath Koi Aur Bhi Safar Mein Tha

Kabhi Main Aab Ke Tamir-Karda Qasr Mein Hun
Kabhi Hawa Mein Banae Hue Se Ghar Mein Tha

Jhijak Raha Tha Wo Kahne Se Koi Baat Aisi
Main Chup Khada Tha Ki Sab Kuchh Meri Nazar Mein Tha

Yahi Samajh Ke Use Khud Sada Na Di Main Ne
Wo Tez-Gam Kisi Dur Ke Safar Mein Tha

Kabhi Hun Teri Khamoshi Ke Katte Sahil Par
Kabhi Main Lautti Aawaz Ke Bhanwar Mein Tha

Hamari Aankh Mein Aa Kar Bana Ek Ashk Wo Rang
Jo Barg-E-Sabz Ke Andar Na Shakh-E-Tar Mein Tha

Koi Bhi Ghar Mein Samajhta Na Tha Mere Dukh Sukh
Ek Ajnabi Ki Tarah Main Khud Apne Ghar Mein Tha

Abhi Na Barse The ‘Bani’ Ghire Hue Baadal
Main Udti Khak Ki Manind Rahguzar Mein Tha

نہ منزلیں تھیں نہ کچھ دل میں تھا نہ سر میں تھا
عجب نظارۂ لا سمتیت نظر میں تھا

عتاب تھا کسی لمحے کا اک زمانے پر
کسی کو چین نہ باہر تھا اور نہ گھر میں تھا

چھپا کے لے گیا دنیا سے اپنے دل کے گھاؤ
کہ ایک شخص بہت طاق اس ہنر میں تھا

کسی کے لوٹنے کی جب صدا سنی تو کھلا
کہ میرے ساتھ کوئی اور بھی سفر میں تھا

کبھی میں آب کے تعمیر کردہ قصر میں ہوں
کبھی ہوا میں بنائے ہوئے سے گھر میں تھا

جھجک رہا تھا وہ کہنے سے کوئی بات ایسی
میں چپ کھڑا تھا کہ سب کچھ مری نظر میں تھا

یہی سمجھ کے اسے خود صدا نہ دی میں نے
وہ تیز گام کسی دور کے سفر میں تھا

کبھی ہوں تیری خموشی کے کٹتے ساحل پر
کبھی میں لوٹتی آواز کے بھنور میں تھا

ہماری آنکھ میں آ کر بنا اک اشک وہ رنگ
جو برگ سبز کے اندر نہ شاخ تر میں تھا

کوئی بھی گھر میں سمجھتا نہ تھا مرے دکھ سکھ
ایک اجنبی کی طرح میں خود اپنے گھر میں تھا

ابھی نہ برسے تھے بانیؔ گھرے ہوئے بادل
میں اڑتی خاک کی مانند رہ گزر میں تھا

Na Manzilen Thin Na Kuchh Dil Mein Tha – Poetry