Chupke Chupke Raat Din Aansoo Bahana Yaad Hai
Ghulam Ali Lyrics
Poet: Hasrat Mohani
Chupke Chupke Raat Din Aansoo Bahana Yaad Hai
Hum Ko Ab Tak Aashqi Ka Woh Zamana Yaad Hai
Ba Hazaran Iztiraab O Sad Hazaran Ishtiyaq
Tujh Se Woh Pehle Pehl Dil Ka Lagana Yaad Hai
Baar Baar Uthna Ussi Janib Nigah-e-Shoq Ka
Aur Tera Ghurfe Se Woh Aankhen Ladaana Yaad Hai
Tujh Se Kuch Milte Hi Woh Bebak Ho Jaana Mera
Aur Tera Daanton Mein Woh Ungli Dabana Yaad Hai
Kheench Lena Woh Mera Parde Ka Kona Dafatan
Aur Dupatte Se Tera Woh Munh Chhupana Yaad Hai
Jaan Kar Sota Tujhe Woh Qasd-e-Pa Bosi Mera
Aur Tera Thukra Ke Sar Woh Muskuraana Yaad Hai
Tujh Ko Jab Tanha Kabhi Paana To Az Raah-e-Lehaaz
Haal-e-Dil Baton Hi Baton Mein Jatana Yaad Hai
Jab Siwa Mere Tumhara Koi Deewana Na Tha
Sach Kaho Kuch Tum Ko Bhi Woh Karkhana Yaad Hai
Ghair Ki Nazron Se Bach Kar Sab Ki Marzi Ke Khilaaf
Woh Tera Chori Chhupe Raaton Ko Aana Yaad Hai
Aa Gaya Gar Wasl Ki Shab Bhi Kahin Zikr-e-Firaaq
Woh Tera Ro Ro Ke Mujh Ko Bhi Rulana Yaad Hai
Dopeher Ki Dhoop Mein Mere Bulane Ke Liye
Woh Tera Kothay Pe Nange Paon Aana Yaad Hai
Aaj Tak Nazron Mein Hai Woh Sohbat-e-Raaz o Niyaz
Apna Jaana Yaad Hai Tera Bulana Yaad Hai
Meethi Meethi Chhed Kar Baatein Nirali Pyaar Ki
Zikr Dushman Ka Woh Baton Mein Udaana Yaad Hai
Dekhna Mujh Ko Jo Bargashta To So So Naaz Se
Jab Mana Lena To Phir Khud Rooth Jaana Yaad Hai
Chori Chori Hum Se Tum Aa Kar Mile The Jis Jagah
Muddatein Guzrin Par Ab Tak Woh Thikana Yaad Hai
Shoq Mein Mehndi Ke Woh Be-Dast-o-Pa Hona Tera
Aur Mera Woh Chhedna Woh Gudgudana Yaad Hai
Ba Wajood-e-Iddaa-e-Ittaqa Hasrat Mujhe
Aaj Tak Ahad-e-Hawas Ka Woh Fasana Yaad Hai
Chupke Chupke Raat Din Aansoo Bahana Yaad Hai
[Lyrics in Urdu]
چپکے چپکے رات دن آنسو بہانا یاد ہے
ہم کو اب تک عاشقی کا وہ زمانا یاد ہے
باہزاراں اضطراب و صدہزاراں اشتیاق
تجھ سے وہ پہلے پہل دل کا لگانا یاد ہے
بار بار اٹھنا اسی جانب نگاہ شوق کا
اور ترا غرفے سے وہ آنکھیں لڑانا یاد ہے
تجھ سے کچھ ملتے ہی وہ بے باک ہو جانا مرا
اور ترا دانتوں میں وہ انگلی دبانا یاد ہے
کھینچ لینا وہ مرا پردے کا کونا دفعتاً
اور دوپٹے سے ترا وہ منہ چھپانا یاد ہے
جان کر سوتا تجھے وہ قصد پا بوسی مرا
اور ترا ٹھکرا کے سر وہ مسکرانا یاد ہے
تجھ کو جب تنہا کبھی پانا تو از راہ لحاظ
حال دل باتوں ہی باتوں میں جتانا یاد ہے
جب سوا میرے تمہارا کوئی دیوانہ نہ تھا
سچ کہو کچھ تم کو بھی وہ کارخانا یاد ہے
غیر کی نظروں سے بچ کر سب کی مرضی کے خلاف
وہ ترا چوری چھپے راتوں کو آنا یاد ہے
آ گیا گر وصل کی شب بھی کہیں ذکر فراق
وہ ترا رو رو کے مجھ کو بھی رلانا یاد ہے
دوپہر کی دھوپ میں میرے بلانے کے لیے
وہ ترا کوٹھے پہ ننگے پاؤں آنا یاد ہے
آج تک نظروں میں ہے وہ صحبت راز و نیاز
اپنا جانا یاد ہے تیرا بلانا یاد ہے
میٹھی میٹھی چھیڑ کر باتیں نرالی پیار کی
ذکر دشمن کا وہ باتوں میں اڑانا یاد ہے
دیکھنا مجھ کو جو برگشتہ تو سو سو ناز سے
جب منا لینا تو پھر خود روٹھ جانا یاد ہے
چوری چوری ہم سے تم آ کر ملے تھے جس جگہ
مدتیں گزریں پر اب تک وہ ٹھکانا یاد ہے
شوق میں مہندی کے وہ بے دست و پا ہونا ترا
اور مرا وہ چھیڑنا وہ گدگدانا یاد ہے
باوجود ادعائے اتقا حسرتؔ مجھے
آج تک عہد ہوس کا وہ فسانا یاد ہے
