Dil Hijr Ke Dard Se Bojhal Hai
Ibn-e-Insha Poetry
Dil Hijr Ke Dard Se Bojhal Hai Ab Aan Milo To Behtar Ho
Is Baat Se Hum Ko Kya Matlab Ye Kaise Ho Ye Kyunkar Ho
Ek Bhik Ke Donon Kase Hain Ek Pyas Ke Dono Pyase Hain
Hum Kheti Hain Tum Baadal Ho Hum Nadiyan Hain Tum Sagar Ho
Ye Dil Hai Ki Jalte Sine Mein Ek Dard Ka PhoDa AllhaD Sa
Na Gupt Rahe Na PhuT Bahe Koi Marham Ho Koi Nishtar Ho
Hum Sanjh Samay Ki Chhaya Hain Tum ChaDhti Raat Ke Chandraman
Hum Jate Hain Tum Aate Ho Phir Mel Ki Surat Kyunkar Ho
Ab Husn Ka Rutba ‘Ali Hai Ab Husn Se Sahra Khali Hai
Chal Basti Mein Banjara Ban Chal Nagri Mein Saudagar Ho
Jis Chiz Se Tujh Ko Nisbat Hai Jis Chiz Ki Tujh Ko Chahat Hai
Wo Sona Hai Wo Hira Hai Wo MaTi Ho Ya Kankar Ho
Ab ‘Insha’-Ji Ko Bulana Kya Ab Pyar Ke Dip Jalana Kya
Jab Dhup Aur Chhaya Ek Se Hon Jab Din Aur Raat Barabar Ho
Wo Raaten Chand Ke Sath Gain Wo Baaten Chand Ke Sath Gain
Ab Sukh Ke Sapne Kya Dekhen Jab Dukh Ka Suraj Sar Par Ho
دل ہجر کے درد سے بوجھل ہے اب آن ملو تو بہتر ہو
اس بات سے ہم کو کیا مطلب یہ کیسے ہو یہ کیوں کر ہو
اک بھیک کے دونوں کاسے ہیں اک پیاس کے دونو پیاسے ہیں
ہم کھیتی ہیں تم بادل ہو ہم ندیاں ہیں تم ساگر ہو
یہ دل ہے کہ جلتے سینے میں اک درد کا پھوڑا الہڑ سا
نا گپت رہے نا پھوٹ بہے کوئی مرہم ہو کوئی نشتر ہو
ہم سانجھ سمے کی چھایا ہیں تم چڑھتی رات کے چندرماں
ہم جاتے ہیں تم آتے ہو پھر میل کی صورت کیوں کر ہو
اب حسن کا رتبہ عالی ہے اب حسن سے صحرا خالی ہے
چل بستی میں بنجارہ بن چل نگری میں سوداگر ہو
جس چیز سے تجھ کو نسبت ہے جس چیز کی تجھ کو چاہت ہے
وہ سونا ہے وہ ہیرا ہے وہ ماٹی ہو یا کنکر ہو
اب انشاؔ جی کو بلانا کیا اب پیار کے دیپ جلانا کیا
جب دھوپ اور چھایا ایک سے ہوں جب دن اور رات برابر ہو
وہ راتیں چاند کے ساتھ گئیں وہ باتیں چاند کے ساتھ گئیں
اب سکھ کے سپنے کیا دیکھیں جب دکھ کا سورج سر پر ہو
