Ek Hi Muzhda Subh Lati Hai
Jaun Elia Poetry
Ek Hi Muzhda Subh Lati Hai
Dhup Aangan Mein Phail Jati Hai
Rang-E-Mausam Hai Aur Baad-E-Saba
Shahr Kuchon Mein Khak UDati Hai
Farsh Par Kaghaz UDte Phirte Hain
Mez Par Gard Jamti Jati Hai
Sochta Hun Ki Us Ki Yaad Aakhir
Ab Kise Raat Bhar Jagati Hai
Main Bhi Izn-E-Nawa-Gari Chahun
Be-Dili Bhi To Lab Hilati Hai
So Gae PeD Jag Uthi Khushbu
Zindagi Khwab Kyun Dikhati Hai
Us Sarapa Wafa Ki Furqat Mein
Khwahish-E-Ghair Kyun Satati Hai
Aap Apne Se Ham-Sukhan Rahna
Ham-Nashin Sans Phul Jati Hai
Kya Sitam Hai Ki Ab Teri Surat
Ghaur Karne Pe Yaad Aati Hai
Kaun Is Ghar Ki Dekh-Bhaal Kare
Roz Ek Chiz Tut Jati Hai
ایک ہی مژدہ صبح لاتی ہے
دھوپ آنگن میں پھیل جاتی ہے
رنگ موسم ہے اور باد صبا
شہر کوچوں میں خاک اڑاتی ہے
فرش پر کاغذ اڑتے پھرتے ہیں
میز پر گرد جمتی جاتی ہے
سوچتا ہوں کہ اس کی یاد آخر
اب کسے رات بھر جگاتی ہے
میں بھی اذن نوا گری چاہوں
بے دلی بھی تو لب ہلاتی ہے
سو گئے پیڑ جاگ اٹھی خوشبو
زندگی خواب کیوں دکھاتی ہے
اس سراپا وفا کی فرقت میں
خواہش غیر کیوں ستاتی ہے
آپ اپنے سے ہم سخن رہنا
ہم نشیں سانس پھول جاتی ہے
کیا ستم ہے کہ اب تری صورت
غور کرنے پہ یاد آتی ہے
کون اس گھر کی دیکھ بھال کرے
روز اک چیز ٹوٹ جاتی ہے
