Firaq - Sar Mein Souda Bhi Nahin Dil Mein Tamanna Bhi Nahi

Sar Mein Souda Bhi Nahin Dil Mein Tamanna Bhi Nahi

Sar Mein Souda Bhi Nahi Dil Mein Tamanna Bhi Nahi
Lekin Is Tark-e-Mohabbat Ka Bharosa Bhi Nahi

Dil Ki Ginti Na Yeganon Mein Na Beganon Mein
Lekin Is Jalwa Gah-e-Naaz Se Uthta Bhi Nahi

Meherbani Ko Mohabbat Nahi Kehte Ae Dost
Aah Ab Mujh Se Teri Ranjish-e-Beja Bhi Nahi

Ek Muddat Se Teri Yaad Bhi Aayi Na Humein
Aur Hum Bhool Gaye Hon Tujhe Aisa Bhi Nahi

Aaj Ghaflat Bhi Un Aankhon Mein Hai Pehle Se Sawa
Aaj Hi Khatir-e-Beemaar Shakeeba Bhi Nahi

Baat Yeh Hai Ke Sukoon Dil-e-Wahshi Ka Maqam
Kunj-e-Zindan Bhi Nahi Wus’at-e-Sehra Bhi Nahi

Are Siyyad Humein Gul Hain Humein Bulbul Hain
Tu Ne Kuch Aah Suna Bhi Nahi Dekha Bhi Nahi

Aah Yeh Majma-e-Ahbaab Yeh Bazm-e-Khamosh
Aaj Mehfil Mein Firaq Sukhan Ara Bhi Nahi

Yeh Bhi Sach Hai Ke Mohabbat Pe Nahi Main Majboor
Yeh Bhi Sach Hai Ke Tera Husn Kuch Aisa Bhi Nahi

Yoon To Hangaame Uthate Nahi Deewana-e-Ishq
Magar Ae Dost Kuch Aeson Ka Thikana Bhi Nahi

Fitrat-e-Husn To Maloom Hai Tujh Ko Hamdam
Chaara Hi Kya Hai Bajuz Sabr So Hota Bhi Nahi

Munh Se Hum Apne Bura To Nahi Kehte Ke Firaq
Hai Tera Dost Magar Aadmi Achha Bhi Nahi

سر میں سودا بھی نہیں دل میں تمنا بھی نہیں
لیکن اس ترک محبت کا بھروسا بھی نہیں

دل کی گنتی نہ یگانوں میں نہ بیگانوں میں
لیکن اس جلوہ گہہ ناز سے اٹھتا بھی نہیں

مہربانی کو محبت نہیں کہتے اے دوست
آہ اب مجھ سے تری رنجش بے جا بھی نہیں

ایک مدت سے تری یاد بھی آئی نہ ہمیں
اور ہم بھول گئے ہوں تجھے ایسا بھی نہیں

آج غفلت بھی ان آنکھوں میں ہے پہلے سے سوا
آج ہی خاطر بیمار شکیبا بھی نہیں

بات یہ ہے کہ سکون دل وحشی کا مقام
کنج زنداں بھی نہیں وسعت صحرا بھی نہیں

ارے صیاد ہمیں گل ہیں ہمیں بلبل ہیں
تو نے کچھ آہ سنا بھی نہیں دیکھا بھی نہیں

آہ یہ مجمع احباب یہ بزم خاموش
آج محفل میں فراقؔ سخن آرا بھی نہیں

یہ بھی سچ ہے کہ محبت پہ نہیں میں مجبور
یہ بھی سچ ہے کہ ترا حسن کچھ ایسا بھی نہیں

یوں تو ہنگامے اٹھاتے نہیں دیوانۂ عشق
مگر اے دوست کچھ ایسوں کا ٹھکانا بھی نہیں

فطرت حسن تو معلوم ہے تجھ کو ہمدم
چارہ ہی کیا ہے بجز صبر سو ہوتا بھی نہیں

منہ سے ہم اپنے برا تو نہیں کہتے کہ فراقؔ
ہے ترا دوست مگر آدمی اچھا بھی نہیں