Hijr Ki Shab Hai Aur Ujaala Hai
Khumar Barabankvi
ہجر کی شب ہے اور اجالا ہے
کیا تصور بھی لٹنے والا ہے
غم تو ہے عین زندگی لیکن
غم گساروں نے مار ڈالا ہے
عشق مجبور و نا مراد سہی
پھر بھی ظالم کا بول بالا ہے
دیکھ کر برق کی پریشانی
آشیاں خود ہی پھونک ڈالا ہے
کتنے اشکوں کو کتنی آہوں کو
اک تبسم میں اس نے ڈھالا ہے
تیری باتوں کو میں نے اے واعظ
احتراماً ہنسی میں ٹالا ہے
موت آئے تو دن پھریں شاید
زندگی نے تو مار ڈالا ہے
شعر نغمہ شگفتگی مستی
غم کا جو روپ ہے نرالا ہے
لغزشیں مسکرائی ہیں کیا کیا
ہوش نے جب مجھے سنبھالا ہے
دم اندھیرے میں گھٹ رہا ہے خمارؔ
اور چاروں طرف اجالا ہے
Hijr Ki Shab Hai Aur Ujaala Hai
Kya Tasawwur Bhi Luttne Wala Hai
Gham To Hai Aeen Zindagi Lekin
Gham Gusaroon Ne Maar Daala Hai
Ishq Majboor O Na-Muraad Sahi
Phir Bhi Zaalim Ka Bol Baala Hai
Dekh Kar Barq Ki Pareshani
Aashiyaan Khud Hi Phoonk Daala Hai
Kitne Ashkon Ko Kitni Aahon Ko
Ek Tabassum Mein Us Ne Dhaala Hai
Teri Baatoon Ko Main Ne Ae Waiz
Ehteraman Hansi Mein Taala Hai
Maut Aaye To Din Phirain Shayad
Zindagi Ne To Maar Daala Hai
She’r Naghma Shaguftagi Masti
Gham Ka Jo Roop Hai Niraala Hai
Laghzishen Muskarayi Hain Kya Kya
Hosh Ne Jab Mujhe Sanbhaala Hai
Dam Andhere Mein Ghutt Raha Hai Khumaar
Aur Chaaron Taraf Ujaala Hai
