Meray Hum Safar, Tujhe Kya Khabar! (Amjad Islam Amjad)

Meray Hum Safar, Tujhe Kya Khabar!
Yeh Jo Waqt Hai Kisi Dhoop Chhaon Ke Khel Sa
Isay Dekhtay, Isay Jheeltay
Meri Aankh Gard Se At Gayi
Meray Khawab Rait Mein Kho Gaye
Meray Haath Barf Se Ho Gaye

Meray Be Khabar, Teray Naam Par
Woh Jo Phool Khiltay Thay Hont Par
Woh Jo Deep Jaltay Thay Baam Par
Woh Nahin Rahay
Woh Nahin Rahay

Ke Jo Aik Rabt Tha Darmiyan Woh Bikhar Gaya
Woh Hawa Chali
Kisi Shaam Aisi Hawa Chali
Ke Jo Barg Thay Sar-e-Shaakh-e-Jaan, Woh Gira Diye
Woh Jo Harf Darj Thay Rait Par, Woh Ura Diye

Woh Jo Raaston Ka Yaqeen Thay
Woh Jo Manzilon Ke Ameen Thay
Woh Nishan-e-Pa Bhi Mita Diye

Meray Hum Safar, Hai Wohi Safar
Magar Aik Morr Ke Farq Se
Teray Haath Se Meray Haath Tak
Woh Jo Haath Bhar Ka Tha Faasla
Kai Mausamon Mein Badal Gaya

Usay Naaptay, Usay Kaat’tay
Mera Saara Waqt Nikal Gaya

Tu Meray Safar Ka Shareek Hai
Main Teray Safar Ka Shareek Hoon
Par Jo Darmiyan Se Nikal Gaya
Usi Faaslay Ke Shumaar Mein
Usi Be-Yaqeeni Ke Ghubaar Mein
Usi Rahguzar Ke Hisaar Mein

Tera Raasta Koi Aur Hai
Mera Raasta Koi Aur Hai

(Amjad Islam Amjad)

مرے ہم سفر، تجھے کیا خبر!
یہ جو وقت ہے کسی دُھوپ چھاؤں کے کھیل سا
اِسے دیکھتے، اِسے جھیلتے
مِری آنکھ گرد سے اَٹ گئی
مِرے خواب ریت میں کھو گئے
مِرے ہاتھ برف سے ہو گئے
مِرے بے خبر، ترے نام پر
وہ جو پُھول کھلتے تھے ہونٹ پر
وہ جو دیپ جلتے تھے بام پر،
وہ نہیں رہے
وہ نہیں رہے کہ جو ایک ربط تھا درمیاں وہ بکھر گیا
وہ ہَوا چلی
کسی شام ایسی ہَوا چلی
کہ جو برگ تھے سرِ شاخِ جاں، وہ گرا دیئے
وہ جو حرف درج تھے ریت پر، وہ اُڑا دیئے
وہ جو راستوں کا یقین تھے
وہ جو منزلوں کے امین تھے
وہ نشانِ پا بھی مِٹا دیئے!
مرے ہم سفر، ہے وہی سفر
مگر ایک موڑ کے فرق سے
ترے ہاتھ سے مرے ہاتھ تک
وہ جو ہاتھ بھر کا تھا فاصلہ
کئی موسموں میں بدل گیا
اُسے ناپتے، اُسے کاٹتے
مرا سارا وقت نکل گیا
تو مِرے سفر کا شریک ہے
میں ترے سفر کا شریک ہوں
پہ جو درمیاں سے نکل گیا
اُسی فاصلے کے شمار میں
اُسی بے یقیں سے غبار میں
اُسی رہگزر کے حصار میں
ترا راستہ کوئی اور ہے
مرا راستہ کوئی اور ہے