Muddat Hui Hai Yaar Ko Mehmaan Kiye Hue
Mirza Ghalib Poetry
Muddat Hui Hai Yaar Ko Mehmaan Kiye Hue
Josh-e-Qadah Se Bazm, Charaghan Kiye Hue
Karta Hoon Jama Phir Jigar-e-Lakht Lakht Ko
Arsa Hua Hai Daawat-e-Muzhgan Kiye Hue
Phir Waz‘-e-Ihtiyaat Se Rukne Laga Hai Dam
Barson Hue Hain Chaak-e-Girebaan Kiye Hue
Phir Garam Naala Haaye Shararbaar Hai Nafs
Muddat Hui Hai Sair-e-Charaghan Kiye Hue
Phir Pursish-e-Jarahat-e-Dil Ko Chala Hai Ishq
Saamaan-e-Sadahzaar Namakdaan Kiye Hue
Phir Bhar Raha Hoon Khaama-e-Muzhgan Ba Khoon-e-Dil
Saaz-e-Chaman Tarazi-e-Daamaan Kiye Hue
Baaham Digar Hue Hain Dil-o-Deeda Phir Raqeeb
Nazara-e-O Khayaal Ka Saamaan Kiye Hue
Dil Phir Tawaaf Kooye Malaamat Ko Jaye Hai
Pindaar Ka Sanamkada Veeraan Kiye Hue
Phir Shauq Kar Raha Hai Khareedaar Ki Talab
Arz-e-Mataa‘-e-Aqal-o-Dil-o-Jaan Kiye Hue
Doray Hai Phir Har Ek Gul-o-Laala Par Khayaal
Sad Gulistaan Nigaah Ka Saamaan Kiye Hue
Phir Chahta Hoon Naam-e-Dildaar Kholna
Jaan Nazar Dilfareebi-e-Unwaan Kiye Hue
Maangay Hai Phir Kisi Ko Lab-e-Baam Par Hawas
Zulf-e-Siyaah Rukh Pe Pareshan Kiye Hue
Chahe Hai Phir Kisi Ko Muqabil Mein Aarzu
Surmay Se Tez Doshna-e-Muzhgan Kiye Hue
Ek Nau Bahaar-e-Naaz Ko Taakay Hai Phir Nigaah
Chehra Farogh-e-Mai Se Gulistaan Kiye Hue
Phir Jee Mein Hai Ke Dar Pe Kisi Ke Pare Rahen
Sar Zair-e-Baar-e-Minnat-e-Darban Kiye Hue
Jee Dhoondta Hai Phir Wohi Fursat Ke Raat Din
Baithay Rahen Tasawwur-e-Jaanan Kiye Hue
Ghalib Hamein Na Chheir Ke Phir Josh-e-Ashk Se
Baithay Hain Hum Tahiya-e-Toofaan Kiye Hue
Muddat Hui Hai Yaar Ko Mehmaan Kiye Hue
Poetry in Urdu
مدت ہوئی ہے یار کو مہماں کیے ہوئے
جوشِ قدح سے بزم، چراغاں کیے ہوئے
کرتا ہوں جمع پھر جگرِ لخت لخت کو
عرصہ ہوا ہے دعوتِ مژگاں کیے ہوئے
پھر وضعِ احتیاط سے رکنے لگا ہے دم
برسوں ہوئے ہیں چاکِ گریباں کیے ہوئے
پھر گرم نالہ ہائے شرربار ہے نفس
مدت ہوئی ہے سیرِ چراغاں کیے ہوئے
پھر پرسشِ جراحتِ دل کو چلا ہے عشق
سامانِ صدہزار نمکداں کیے ہوئے
پھر بھر رہا ہوں خامۂ مژگاں بہ خونِ دل
سازِ چمن طرازیِ داماں کیے ہوئے
باہم دگر ہوئے ہیں دل و دیدہ پھر رقیب
نظارۂ و خیال کا ساماں کیے ہوئے
دل پھر طواف کوئے ملامت کو جائے ہے
پندار کا صنم کدہ ویراں کیے ہوئے
پھر شوق کر رہا ہے خریدار کی طلب
عرضِ متاعِ عقل و دل و جاں کیے ہوئے
دوڑے ہے پھر ہر ایک گل و لالہ پر خیال
صد گلستاں نگاہ کا ساماں کیے ہوئے
پھر چاہتا ہوں نامۂ دل دار کھولنا
جاں نذر دل فریبیِ عنواں کیے ہوئے
مانگے ہے پھر کسی کو لب بام پر ہوس
زلفِ سیاہ رخ پہ پریشاں کیے ہوئے
چاہے ہے پھر کسی کو مقابل میں آرزو
سرمے سے تیز دشنۂ مژگاں کیے ہوئے
اک نو بہارِ ناز کو تاکے ہے پھر نگاہ
چہرہ فروغِ مَے سے گلستاں کیے ہوئے
پھر جی میں ہے کہ در پہ کسی کے پڑے رہیں
سر زیرِ بارِ منت درباں کیے ہوئے
جی ڈھونڈتا ہے پھر وہی فرصت کہ رات دن
بیٹھے رہیں تصورِ جاناں کیے ہوئے
غالبؔ ہمیں نہ چھیڑ کہ پھر جوشِ اشک سے
بیٹھے ہیں ہم تہیۂ طوفاں کیے ہوئے
