Pehla Sa Haal Pehli Si Wehshat Nahi Rahi – Naseer Turabi

Pehla Sa Haal Pehli Si Wehshat Nahi Rahi – Naseer Turabi

Pehla Sa Haal Pehli Si Wehshat Nahi Rahi
Shayad Ke Tere Hijr Ki Aadat Nahi Rahi

Shehron Mein Ek Shehar Mere Ratjagon Ka Shehar
Kooche To Kya Dilon Hi Mein Wusat Nahi Rahi

Logon Mein Mere Log Woh Dildariyon Ke Log
Bichhre To Door Door Tak Raqabat Nahi Rahi

Shaamon Mein Ek Shaam Woh Aawargi Ki Shaam
Ab Neem-Wa Dareechon Ki Hasrat Nahi Rahi

Raaton Mein Ek Raat Mere Ghar Ki Chaand Raat
Aangan Ko Chaandni Ki Zaroorat Nahi Rahi

Raahon Mein Ek Raah Ghar Lautne Ki Raah
Thehre Kisi Jagah Woh Tabiyat Nahi Rahi

Yaadon Mein Ek Yaad Koi Dil-Shikan Si Yaad
Woh Yaad Kahan Hai Ke Fursat Nahi Rahi

Naamon Mein Ek Naam Sawaal-Aashna Ka Naam
Ab Dil Pe Aisi Koi Ibaarat Nahi Rahi

Khwaabon Mein Ek Khwaab Teri Hamrahi Ka Khwaab
Ab Tujh Ko Dekhne Ki Bhi Fursat Nahi Rahi

Rangon Mein Ek Rang Teri Saadgi Ka Rang
Aisi Hawa Chali Ke Woh Rangat Nahi Rahi

Baaton Mein Ek Baat Teri Chahaton Ki Baat
Aur Ab Yeh Ittefaq Ke Chahat Nahi Rahi

Faslon Mein Ek Fasal Woh Jaandadgi Ki Fasal
Baadal Ko Yaan Zameen Se Raghbat Nahi Rahi

Zakhmon Mein Ek Zakhm Mataa-E-Hunar Ka Zakhm
Ab Koi Aarzoo-E-Jaraahat Nahi Rahi

Sannata Bolta Hai Sada Mat Laga Naseer
Awaaz Reh Gayi Hai Sama’at Nahi Rahi

پہلا سا حال پہلی سی وحشت نہیں رہی​
شاید کہ تیرے ہجر کی عادت نہیں رہی​

شہروں میں ایک شہر میرے رتجگوں کا شہر​
کوچے تو کیا دلوں ہی میں وسعت نہیں رہی​

لوگوں میں میرے لوگ وہ دلداریوں کے لوگ​
بچھڑے تو دور دور تک رقابت نہیں رہی​

شاموں میں ایک شام وہ آوارگی کی شام​
اب نیم وا دریچوں کی حسرت نہیں رہی​

راتوں میں ایک رات میرے گھر کی چاند رات​
آنگن کو چاندنی کی ضرورت نہیں رہی​

راہوں میں ایک راہ گھر لوٹنے کی راہ​
ٹھہرے کسی جگہ وہ طبیعت نہیں رہی​​

یادوں میں ایک یاد کوئی دل شکن سی یاد​
وہ یاد کہاں ہے کہ فرصت نہیں رہی​

ناموں میں ایک نام سوال آشنا کا نام​
اب دل پہ ایسی کوئی عبارت نہیں رہی​

خوابوں میں ایک خواب تیری ہمرہی کا خواب​
اب تجھ کو دیکھنے کی بھی فرصت نہیں رہی​

رنگوں میں ایک رنگ تیری سادگی کا رنگ​
ایسی ہوا چلی کہ وہ رنگت نہیں رہی​

باتوں میں ایک بات تیری چاہتوں کی بات​
اور اب یہ اتفاق کہ چاہت نہیں رہی​

فصلوں میں ایک فصل وہ جاندادگی کی فصل​
بادل کو یاں زمیں سے رغبت نہیں رہی​

زخموں میں ایک زخم متاع ہنر کا زخم​
اب کوئی آرزوئے جراحت نہیں رہی​

سناٹا بولتا ہے صدا مت لگا نصیر​
آواز رہ گئی ہے سماعت نہیں رہی​

(نصیر ترابی)​

Shaam-E-Gham Jab Bikhar Gayi Ho Gi – Urdu Poetry
Apni Har Saans Se Mujh Ko Teri Khushboo Aaye – Qateel Shifai
Duniya Jise Kehte Hain Jadoo Ka Khilona Hai – Nida Fazli