Rasta Bhi Kathin Dhoop Mein Shiddat Bhi Bohat Thi

Rasta Bhi Kathin Dhoop Mein Shiddat Bhi Bohat Thi
Saaye Se Magar Us Ko Mohabbat Bhi Bohat Thi

Khaime Nahin Koi Mere Musafir Ke Jalaaye
Zakhmi Tha Bohat Paaon Masafat Bhi Bohat Thi

Sab Dost Mere Muntazir Parda-e-Shab The
Din Mein To Safar Karne Mein Diqqat Bhi Bohat Thi

Barish Ki Duaon Mein Nami Aankh Ki Mil Jaaye
Jazbe Ki Kabhi Itni Rifaqat Bhi Bohat Thi

Kuch To Tere Mausam Hi Mujhe Raas Kam Aaye
Aur Kuch Meri Maati Mein Baghaawat Bhi Bohat Thi

Phoolon Ka Bikhurna To Muqaddar Hi Tha Lekin
Kuch Is Mein Hawaon Ki Siyasat Bhi Bohat Thi

Woh Bhi Sar-e-Maqtal Hai Ke Sach Jiska Tha Shaahid
Aur Waqif-e-Ahwaal Adalat Bhi Bohat Thi

Is Tark-e-Rifaqat Pe Pareshan To Hoon Lekin
Ab Tak Ke Tere Saath Pe Hairat Bhi Bohat Thi

Khush Aaye Tujhe Sheher-e-Munafiq Ki Ameeri
Hum Logon Ko Sach Kehne Ki Aadat Bhi Bohat Thi

رستہ بھی کٹھن دھوپ میں شدت بھی بہت تھی
سائے سے مگر اس کو محبت بھی بہت تھی

خیمے نہ کوئی میرے مسافر کے جلائے
زخمی تھا بہت پاؤں مسافت بھی بہت تھی

سب دوست مرے منتظر پردۂ شب تھے
دن میں تو سفر کرنے میں دقت بھی بہت تھی

بارش کی دعاؤں میں نمی آنکھ کی مل جائے
جذبے کی کبھی اتنی رفاقت بھی بہت تھی

کچھ تو ترے موسم ہی مجھے راس کم آئے
اور کچھ مری مٹی میں بغاوت بھی بہت تھی

پھولوں کا بکھرنا تو مقدر ہی تھا لیکن
کچھ اس میں ہواؤں کی سیاست بھی بہت تھی

وہ بھی سر مقتل ہے کہ سچ جس کا تھا شاہد
اور واقف احوال عدالت بھی بہت تھی

اس ترک رفاقت پہ پریشاں تو ہوں لیکن
اب تک کے ترے ساتھ پہ حیرت بھی بہت تھی

خوش آئے تجھے شہر منافق کی امیری
ہم لوگوں کو سچ کہنے کی عادت بھی بہت تھی

ویڈیو
THIS VIDEO IS PLAYING FROM YOUTUBE

مأخذ :

رستہ بھی کٹھن دھوپ میں شدت بھی بہت تھی - پروین شاکر