Shikast by Sahir Ludhianvi
Apne Seene Se Lagaaye Huye Umeed Ki Laash
Muddaton Zeest Ko Naashaad Kiya Hai Main Ne
Tu Ne To Aik Hi Sadme Se Kiya Tha Do Chaar
Dil Ko Har Tarah Se Barbaad Kiya Hai Main Ne
Jab Bhi Raahon Mein Nazar Aaye Hareeri Malboos
Sard Aahon Mein Tujhe Yaad Kiya Hai Main Ne
Aur Ab Jab Ke Meri Rooh Ki Pehnaai Mein
Aik Sansaan Si Maghmoom Ghata Chhaai Hai
Tu Dhamakte Huye Aariz Ki Shuaaein Lekar
Gul Shudah Shamain Jalaane Ko Chali Aai Hai
Meri Mehboob Yeh Hangaama-e-Tajdeed-e-Wafa
Meri Afsurdah Jawani Ke Liye Raas Nahi
Main Ne Jo Phool Chune The Tere Qadmon Ke Liye
Un Ka Dhundla Sa Tasawwur Bhi Mere Paas Nahi
Aik Yakh Busta Udaasi Hai Dil-o-Jaan Pe Moheet
Ab Meri Rooh Mein Baqi Hai Na Umeed Na Josh
Reh Gaya Dab Ke Garaan Baar Salasil Ke Tale
Meri Darmandah Jawani Ki Umangon Ka Khurosh
Regzaaron Mein Bagolon Ke Siwa Kuch Bhi Nahi
Saaya-e-Abr-e-Gurezaan Se Mujhe Kya Lena
Bujh Chuke Hain Mere Seene Mein Mohabbat Ke Kanwal
Ab Tere Husn-e-Pashimaan Se Mujhe Kya Lena
Tere Aariz Pe Ye Dhalke Huye Seemeen Aansoo
Meri Afsurdagi-e-Gham Ka Madawa To Nahi
Teri Mehboob Nigaahon Ka Payam-e-Tajdeed
Ek Talafi Hi Sahi Meri Tamanna To Nahi
شکست – ساحر لدھیانوی
اپنے سینے سے لگائے ہوئے امید کی لاش
مدتوں زیست کو ناشاد کیا ہے میں نے
تو نے تو ایک ہی صدمے سے کیا تھا دو چار
دل کو ہر طرح سے برباد کیا ہے میں نے
جب بھی راہوں میں نظر آئے حریری ملبوس
سرد آہوں میں تجھے یاد کیا ہے میں نے
اور اب جب کہ مری روح کی پہنائی میں
ایک سنسان سی مغموم گھٹا چھائی ہے
تو دمکتے ہوئے عارض کی شعاعیں لے کر
گل شدہ شمعیں جلانے کو چلی آئی ہے
میری محبوب یہ ہنگامۂ تجدید وفا
میری افسردہ جوانی کے لیے راس نہیں
میں نے جو پھول چنے تھے ترے قدموں کے لیے
ان کا دھندلا سا تصور بھی مرے پاس نہیں
ایک یخ بستہ اداسی ہے دل و جاں پہ محیط
اب مری روح میں باقی ہے نہ امید نہ جوش
رہ گیا دب کے گراں بار سلاسل کے تلے
میری درماندہ جوانی کی امنگوں کا خروش
ریگزاروں میں بگولوں کے سوا کچھ بھی نہیں
سایۂ ابر گریزاں سے مجھے کیا لینا
بجھ چکے ہیں مرے سینے میں محبت کے کنول
اب ترے حسن پشیماں سے مجھے کیا لینا
تیرے عارض پہ یہ ڈھلکے ہوئے سیمیں آنسو
میری افسردگئ غم کا مداوا تو نہیں
تیری محبوب نگاہوں کا پیام تجدید
اک تلافی ہی سہی میری تمنا تو نہیں
