Visaal o Hijr Se Waabasta Tohmatein Bhi Gayi
Visaal o Hijr Se Waabasta Tohmatein Bhi Gayi
Woh Faasle Bhi Gaye Ab Woh Qurbatein Bhi Gayi
Dilon Ka Haal To Yeh Hai Ke Rabt Hai Na Gurez
Mohabbatein To Gayi Thin Adaawatein Bhi Gayi
Lubha Liya Hai Bohat Dil Ko Rasm-e-Duniya Ne
Sitamgaron Se Sitam Ki Shikayatein Bhi Gayi
Guroor-e-Kaj-Kulahi Jin Ke Dam Se Qaim Tha
Woh Jur’atein Bhi Gayi Woh Jisaaratein Bhi Gayi
Na Ab Woh Shiddat-e-Awaargi Na Wahshat-e-Dil
Hamare Naam Ki Kuch Aur Shohratein Bhi Gayi
Dil Tabaah Tha Be-Naam Hasraton Ka Diyar
So Ab To Dil Se Woh Be-Naam Hasratein Bhi Gayi
Hue Hain Jab Se Barahna Zarooraton Ke Badan
Khayaal o Khwaab Ki Pinhan Nazakatein Bhi Gayi
Hujoom-e-Sarv o Saman Hai Na Sail-e-Nikhat o Rang
Woh Qaamatein Bhi Gayi Woh Qayamatein Bhi Gayi
Bhula Diye Gham-e-Duniya Ne Ishq Ke Aadaab
Kisi Ke Naaz Uthaane Ki Fursatein Bhi Gayi
Kare Ga Kaun Mata-e-Khuloos Yoon Arzaan
Hamare Saath Hamari Sakhawatein Bhi Gayi
Na Chaand Mein Hai Woh Chehra Na Sarv Mein Hai Woh Jism
Gaya Woh Shakhs To Us Ki Shabahatain Bhi Gayi
Gaya Woh Daur Gham-e-Intizaar-e-Yaar Sahar
Aur Apni Zaat Pe Danista Zahmatein Bhi Gayi
وصال و ہجر سے وابستہ تہمتیں بھی گئیں
وہ فاصلے بھی گئے اب وہ قربتیں بھی گئیں
دلوں کا حال تو یہ ہے کہ ربط ہے نہ گریز
محبتیں تو گئیں تھی عداوتیں بھی گئیں
لبھا لیا ہے بہت دل کو رسم دنیا نے
ستم گروں سے ستم کی شکایتیں بھی گئیں
غرور کج کلہی جن کے دم سے قائم تھا
وہ جرأتیں بھی گئیں وہ جسارتیں بھی گئیں
نہ اب وہ شدت آوارگی نہ وحشت دل
ہمارے نام کی کچھ اور شہرتیں بھی گئیں
دل تباہ تھا بے نام حسرتوں کا دیار
سو اب تو دل سے وہ بے نام حسرتیں بھی گئیں
ہوئے ہیں جب سے برہنہ ضرورتوں کے بدن
خیال و خواب کی پنہاں نزاکتیں بھی گئیں
ہجوم سرو و سمن ہے نہ سیل نکہت و رنگ
وہ قامتیں بھی گئیں وہ قیامتیں بھی گئیں
بھلا دیے غم دنیا نے عشق کے آداب
کسی کے ناز اٹھانے کی فرصتیں بھی گئیں
کرے گا کون متاع خلوص یوں ارزاں
ہمارے ساتھ ہماری سخاوتیں بھی گئیں
نہ چاند میں ہے وہ چہرہ نہ سرو میں ہے وہ جسم
گیا وہ شخص تو اس کی شباہتیں بھی گئیں
گیا وہ دور غم انتظار یار سحرؔ
اور اپنی ذات پہ دانستہ زحمتیں بھی گئیں
