Raat Mein Is Kashmakash Mein Ek Pal Soya Nahi

Raat Mein Is Kashmakash Mein Ek Pal Soya Nahi
Kal Main Jab Jaane Laga To Us Ne Kyun Roka Nahi

Yun Agar Sochun To Ik Ik Naqsh Hai Seene Pe Naqsh
Haye Woh Chehra Ke Phir Bhi Aankh Mein Banta Nahi

Kyun Uraati Phir Rahi Hai Dar Badar Mujh Ko Hawa
Main Agar Ik Shaakh Se Toota Hua Patta Nahi

Aaj Tanha Hoon To Kitna Ajnabi Mahaul Hai
Ek Bhi Raste Ne Tere Shehar Mein Roka Nahi

Harf-e-Barg-e-Khushk Ban Kar Tootte Girte Rahe
Ghuncha-e-Arz-e-Tamanna Hont Par Phoota Nahi

Dard Ka Rasta Hai Ya Hai Saa’at-e-Roz-e-Hisaab
Sikron Logon Ko Roka, Ek Bhi Thehra Nahi

Shabnami Aankhon Ke Jugnu, Kanpte Honton Ke Phool
Ek Lamha Tha Jo Amjad Aaj Tak Guzra Nahi

— Amjad Islam Amjad

رات میں اس کشمکش میں ایک پل سویا نہیں
کل میں جب جانے لگا تو اس نے کیوں روکا نہیں

یوں اگر سوچوں تو اک اک نقش ہے سینے پہ نقش
ہائے وہ چہرہ کہ پھر بھی آنکھ میں بنتا نہیں

کیوں اڑاتی پھر رہی ہے در بدر مجھ کو ہوا
میں اگر اک شاخ سے ٹوٹا ہوا پتا نہیں

آج تنہا ہوں تو کتنا اجنبی ماحول ہے
ایک بھی رستے نے تیرے شہر میں روکا نہیں

حرف برگ خشک بن کر ٹوٹتے گرتے رہے
غنچۂ عرض تمنا ہونٹ پر پھوٹا نہیں

درد کا رستہ ہے یا ہے ساعت روز حساب
سیکڑوں لوگوں کو روکا ایک بھی ٹھہرا نہیں

شبنمی آنکھوں کے جگنو کانپتے ہونٹوں کے پھول
ایک لمحہ تھا جو امجدؔ آج تک گزرا نہیں

رات میں اس کشمکش میں ایک پل سویا نہیں