Hum Ko To Gardish-E-Halaat Pe Rona Aaya

Hum Ko To Gardish-E-Halaat Pe Rona Aaya
Rone Wale Tujhe Kis Baat Pe Rona Aaya

Kaise Jeete Hain Yeh Kis Tarah Jiye Jaate Hain
Ahl-E-Dil Ki Basar Auqaat Pe Rona Aaya

Ji Nahin Aap Se Kya Mujh Ko Shikayat Hogi
Haan Mujhe Talkhi-E-Halaat Pe Rona Aaya

Husn Maghroor Ka Yeh Rang Bhi Dekha Aakhir
Aakhir Un Ko Bhi Kisi Baat Pe Rona Aaya

Kaise Mar Mar Ke Guzari Hai Tumhein Kya Maaloom
Raat Bhar Taron Bhari Raat Pe Rona Aaya

Kitne Betaab The Rim Jhim Mein Piyeinge Lekin
Aayi Barsaat To Barsaat Pe Rona Aaya

Husn Ne Apni Jafaon Pe Bahaye Aansoo
Ishq Ko Apni Shikayaat Pe Rona Aaya

Kitne Anjaan Hain Kya Saadgi Se Poochte Hain
Kahiye Kya Meri Kisi Baat Pe Rona Aaya

Awwal Awwal To Bas Ek Aah Nikal Jaati Thi
Aakhir Aakhir To Mulaqaat Pe Rona Aaya

Saif Yeh Din To Qayamat Ki Tarah Guzra Hai
Jaane Kya Baat Thi Har Baat Pe Rona Aaya

— سیف الدین سیف

ہم کو تو گردش حالات پہ رونا آیا
رونے والے تجھے کس بات پہ رونا آیا

کیسے جیتے ہیں یہ کس طرح جیے جاتے ہیں
اہل دل کی بسر اوقات پہ رونا آیا

جی نہیں آپ سے کیا مجھ کو شکایت ہوگی
ہاں مجھے تلخئ حالات پہ رونا آیا

حسن مغرور کا یہ رنگ بھی دیکھا آخر
آخر ان کو بھی کسی بات پہ رونا آیا

کیسے مر مر کے گزاری ہے تمہیں کیا معلوم
رات بھر تاروں بھری رات پہ رونا آیا

کتنے بیتاب تھے رم جھم میں پئیں گے لیکن
آئی برسات تو برسات پہ رونا آیا

حسن نے اپنی جفاؤں پہ بہائے آنسو
عشق کو اپنی شکایات پہ رونا آیا

کتنے انجان ہیں کیا سادگی سے پوچھتے ہیں
کہیے کیا میری کسی بات پہ رونا آیا

اول اول تو بس ایک آہ نکل جاتی تھی
آخر آخر تو ملاقات پہ رونا آیا

سیفؔ یہ دن تو قیامت کی طرح گزرا ہے
جانے کیا بات تھی ہر بات پہ رونا آیا

Hum Ko To Gardish-E-Halaat Pe Rona Aaya – Ghazal