Aankhon Se Meri Kaun Mere Khwab Le Gaya
Parveen Shakir
Aankhon Se Meri Kaun Mere Khwab Le Gaya
Chashm-e-Sadaf Se Gohar-e-Nayab Le Gaya
Is Shehar-e-Khush-Jamaal Ko Kis Ki Lagi Hai Aah
Kis Dil-Zada Ka Giriya-e-Khoon-Naab Le Gaya
Kuch Nakhuda Ke Faiz Se Sahil Bhi Door Tha
Kuch Qismaton Ke Pher Mein Gardab Le Gaya
Wahan Shehar Doobte Hain, Yahan Bahs Ke Unhen
Khum Le Gaya Hai Ya Kham-e-Mehraab Le Gaya
Kuch Khoi Khoi Aankhen Bhi Mojon Ke Saath Thin
Shayad Unhen Baha Ke Koi Khwab Le Gaya
Toofan-e-Abr-o-Baad Mein Sab Geet Kho Gaye
Jhonka Hawa Ka Haath Se Mizrab Le Gaya
Ghairon Ki Dushmani Ne Na Mara, Magar Hamen
Apnon Ke Iltifaat Ka Zehr Ab Le Gaya
Ae Aankh! Ab To Khwab Ki Duniya Se Laut Aa
Mizhgan To Khol! Shehar Ko Sailaab Le Gaya
آنکھوں سے میری، کون مرے خواب لے گیا
چشمِ صدف سے گوہرِ نایاب لے گیا
اِس شہرِ خوش جمال کو کِس کی لگی ہے آہ
کِس دل زدہ کا گریہ خونناب لے گیا
کُچھ نا خدا کے فیض سے ساحل بھی دُور تھا
کُچھ قسمتوں کے پھیر میں گرداب لے گیا
واں شہر ڈُوبتے ہیں ، یہاں بحث کہ اُنہیں
خُم لے گیا ہے یا خمِ محراب لے گیا
کچھ کھوئی کھوئی آنکھیں بھی موجوں کے ساتھ تھیں
شاید اُنہیں بہا کے کوئی خواب لے گیا
طوفان اَبر و باد میں سب گیت کھو گئے
جھونکا ہَوا کا ہاتھ سے مِضراب لے گیا
غیروں کی دشمنی نے نہ مارا،مگر ہمیں
اپنوں کے التفات کا زہر اب لے گیا
اے آنکھ!اب تو خواب کی دُنیا سے لوٹ آ
مژگاں تو کھول!شہر کو سیلاب لے گیا
پروین شاکر
