Kuch Ajab Aan Se Logon Mein Raha Karte The

Kuch Ajab Aan Se Logon Mein Raha Karte The
Hum Khafa Ho Ke Bhi Aapas Mein Mila Karte The

Itni Tehzeeb-e-Raah-o-Rasm To Baqi Thi Ke Woh
Laakh Ranjish Sahi Vaada To Wafa Karte The

Us Ne Poocha Tha Kai Baar Magar Kya Kehte
Hum Mizajan Hi Pareshan Raha Karte The

Khatam Tha Hum Pe Mohabbat Ka Tamasha Goya
Rooh Aur Jism Ko Har Roz Juda Karte The

Aik Chup Chaap Lagan Si Thi Tere Baare Mein
Log Aa Aa Ke Sunaate The Suna Karte The

Teri Soorat Se Khuda Se Bhi Shanasai Thi
Kaise Kaise Tere Milne Ki Dua Karte The

Us Ko Hamrah Liye Aate The Meri Khatir
Mere Gham Khuar Mere Haq Mein Bura Karte The

Zindagi Hum Se Tere Naaz Uthaye Na Gaye
Saans Lene Ki Faqat Rasm Ada Karte The

Hum Baras Parte The Shaz Apni Hi Tanhaai Par
Abr Ki Tarah Kisi Dar Se Utha Karte The

کچھ عجب آن سے لوگوں میں رہا کرتے تھے
ہم خفا ہو کے بھی آپس میں ملا کرتے تھے

اتنی تہذیب رہ و رسم تو باقی تھی کہ وہ
لاکھ رنجش سہی وعدہ تو وفا کرتے تھے

اس نے پوچھا تھا کئی بار مگر کیا کہتے
ہم مزاجاً ہی پریشان رہا کرتے تھے

ختم تھا ہم پہ محبت کا تماشا گویا
روح اور جسم کو ہر روز جدا کرتے تھے

ایک چپ چاپ لگن سی تھی ترے بارے میں
لوگ آ آ کے سناتے تھے سنا کرتے تھے

تیری صورت سے خدا سے بھی شناسائی تھی
کیسے کیسے ترے ملنے کی دعا کرتے تھے

اس کو ہمراہ لیے آتے تھے میری خاطر
میرے غم خوار مرے حق میں برا کرتے تھے

زندگی ہم سے ترے ناز اٹھائے نہ گئے
سانس لینے کی فقط رسم ادا کرتے تھے

ہم برس پڑتے تھے شاذؔ اپنی ہی تنہائی پر
ابر کی طرح کسی در سے اٹھا کرتے تھے