Hum Jo Pohnchay Sar E Maqtal To Yeh Manzar Dekha - Ghazal

Hum Jo Pohnchay Sar E Maqtal To Yeh Manzar Dekha
Sab Se Ooncha Tha Jo Sar Nok E Sinan Par Dekha

Hum Se Mat Pooch Ke Kab Chaand Ubharta Hai Yahan
Hum Ne Sooraj Bhi Tere Shehar Mein Aa Kar Dekha

Pyaas Yaaron Ko Ab Us Mor Par Le Aayi Hai
Reit Chamki To Yeh Samjhay Ke Samandar Dekha

Aisay Liptay Hain Dar O Baam Se Ab Ke Jaisay
Haadson Ne Bari Muddat Mein Mera Ghar Dekha

Zindagi Bhar Na Hua Khatam Qayamat Ka Azaab
Hum Ne Har Saans Mein Barpa Naya Mahshar Dekha

Itna Be Hiss Ke Pighalta Hi Na Tha Baaton Se
Aadmi Tha Ke Tarasha Hua Pathar Dekha

Dukh Hi Aisa Tha Ke Roya Tera Mohsin Warna
Gham Chhupa Kar Usay Hanstay Huay Aksar Dekha

— Mohsin Naqvi

ہم جو پہنچے سرِ مقتل تو یہ منظر دیکھا
سب سے اُونچا تھا جو سر نوکِ سناں پر دیکھا

ہم سے مت پوچھ کہ کب چاند اُبھرتا ہے یہاں؟
ہم نے سُورج بھی تیرے شہر میں آ کر دیکھا

پیاس یاروں کو اَب اُس موڑ پہ لے آئی ہے
ریت چمکی تو یہ سمجھے کہ سمندر دیکھا

اَیسے لپٹے ہیں دَر و بام سے اَب کے جیسے
حادثوں نے بڑی مُدّت میں میرا گھر دیکھا

زندگی بھر نہ ہُوا ختم قیامت کا عذاب
ہم نے ہر سانس میں برپا نیا محشر دیکھا

اتنا بے حس کہ پگھلتا ہی نہ تھا باتوں سے
آدمی تھا کہ تراشا ہُوا پتھّر دیکھا

دُکھ ہی اَیسا تھا کہ رویا تیرا محسنؔ ورنہ
غم چُھپا کر اُسے ہنستے ہُوئے اکثر دیکھا

محسنؔ نقوی

Hum Jo Pohnchay Sar E Maqtal To Yeh Manzar Dekha – Ghazal